मन्त्री हरायो !

========
उनी गाउँमा पसेर धमाधम किताब बेच्दै थिए। "ओइ अङ (मगर भाषामा जेठा भनेको)! मन्त्री हुनुपर्यो हौ, काठमाडौँ आउ" भनेर बोलाए । दौरा सुरुवाल त कता कताबाट खोजेर ल्याइदिएछन् , औंला निस्किएको जुत्तासँगै सपथ ग्रहण गर्न पुगे।

त्यहीँ मन्त्रालयको एउटा कुनामा ओछ्यान लगाएर सुत्दै थिए। आज फुलपातीदेखि मन्त्रालय पनि दशैंको छुट्टी भो। अब के गरौँ के गरौँ ?

अझै थुप्रै किताब बेच्न बाँकी नै थियो। बुढीसँग भेट नभएको पनि वर्षौं भएको थियो । पोखरातिरै गएर किताब पनि बेच्नुपर्यो, आफू मन्त्री भएको कुरा बुढीलाई पनि सुनाउन जानुपर्यो भनेर टाउकोमा १६ थान किताब हालेर मन्त्रालयबाट बिहानै लुखुर लुखुर निस्किए। बाटामा १० थान जति किताब पनि बेचे । किताब बेचेको पैसा छुट्टै गोजीमा राखे।

एयरपोर्ट जानलाई एकछिन बस पर्खे, बसै आएन। गोजीमा आफ्नो लागि छुट्याएको रकम छामे । हवाई जहाजको एउटा टिकट किनेर पनि ट्याक्सीको भाडा त पुग्ने रहेछ। एउटा ट्याक्सी बोलाएर सिधै काठमाडौँको एयरपोर्ट पुगे।

पोखरा एयरपोर्टमा प्लेनबाट उत्रिए । बचेका ६ वटा किताब टाउकोमा हाले । एयरपोर्ट बाहिर निस्किएर किताब बेच्न मात्र के आँटेका थिए, छेउछाउका मानिसहरू त "मन्त्री मन्त्री" भन्दै जम्मा हुन पो थालिहाले । हत्तनपत्त गोजीमा छामेको अझै ४७० रुपैयाँ बाँकी रहेछ। एउटा ट्याक्सी लिएर सिधै घर हानिए ।

यता मन्त्रालयमा धेरैबेर मन्त्री घुरेको नसुनेपछि ढोका खोलेर बडीगार्ड भित्र पस्यो । मन्त्रीको झोला र १६ वटा किताब पनि गायब रहेछ । आत्तिएर हैरान हुँदै सबैतिर खोज्यो। कहीँ मन्त्री फेला परेनन् । गार्डले बटालियनमा खबर गर्यो। बटालियनले हेडक्वाटरमा खबर गर्यो। हेडक्वाटरले नेपालभरि नै खबर गर्यो। कहीँ कुनै पत्ता लागेन । मन्त्री हराएको कुरा सुरक्षा निकायहरूका देशैभरिका अड्डामा आतङ्कसरि फैलियो । सुरक्षा परिषद्को आपत्कालीन बैठक बस्यो। बडीगार्डलाई स्पष्टीकरणको लागि बोलाइयो।

उता पोखरा एयरपोर्टबाट घर पुगेपछि मन्त्रीले ट्याक्सी ड्राइभरलाई 'कति पैसा दिउँ' भनेर सोधे । ट्याक्सीवालाले रु. ५०० माग्यो । गोजीमा बचेको रु. ४७० ड्राइभरलाई दिए । ३० रुपैयाँ पुगेन । काठमाडौँमा गार्डलाई फोन गरे।

सुरक्षा परिषदमा बयान दिइरहेको गार्डको मोबाइल फोन बज्यो। पदाधिकारीहरूले मन्त्रीको फोन देखेर Hand free गर्न लगाए ।

उताबाट मन्त्रीको आवाज आयो, "भाइ म त पोखरा घरमा आइ पुगेँ कि! मैतीदेवी चोकमा चिया खाएर ५० रुपैयाँ दिएको थिएँ । चियाको २० रुपैयाँ कटाएर ३० रुपैयाँ फिर्ता लिन बिर्सेछु । तपाईँले लिएर राख्नु ल। फेरि दशैं छुट्टीमा त्यो पसले घर गयो भने बर्बाद हुन्छ । १० रुपैयाँ चाहिँ त्यसलाई टिप्स दिनु, १० रुपैयाँ तपाईँले राख्नु, अनि बचेको ३० रुपैयाँ चाहिँ यो ट्याक्सीवाला भाइलाई दिनु ल ।" 

मन्त्रीले ट्याक्सी ड्राइभरलाई भने "त्यो  ३० रुपैयाँ मागेर लानु है भाइ ! मैले भनिदिएको छु।"

काठमाडौँको गार्ड र पोखराको ड्राइभर दुबै ट्वाँ परे । सुरक्षा परिषद्ले पोखराका सबै युनिटहरूलाई निर्देशन दियो, मन्त्रीजी कुनै पनि बेला किताब बेच्न निस्किन सकिबक्सिन्छ । चोक, गौडा, गल्ली सबैमा राम्रो सुरक्षा व्यवस्था मिलाउनु।"

फूलपाती
२०८२/६/१३
राधेराधे, भक्तपुर ।

#jhalendra #zenz #mahabirpun