भगवान् आए भाग्य बाँड्न लिई थालैमा,
बाँड्दा बाँड्दै सकिएछ मेरो पालैमा ।
..................................................
कोही लगे धन दौलत, कोही लगे चैन ।
रूप लगे, यौवन लगे, बाँकी केही छैन।।
सबै लगे - भगवान् त खाली परेछन् !
हातमा पीर चिन्ता भको थाली धरेछन् ।।
मैले पाएँ भगवान - जे होस् थालैमा ।
भाग्य बाँड्दा सकिएछ मेरो पालैमा ।।
..................................................
लुट्न पाउँदा भगवानलाई कोही नगन्ने !
"तिम्लाई केही चाहिन्छ कि ?" भन्दै नभन्ने !!
सुख-चैन लानेहरु कुस्ति खेल्दै पर,
लालचको भुमरीमा जग चराचर ।।
मैले पाएँ छुटकारा स्वार्थी खेलैमा ।
भाग्य बाँड्दा सकिएछ मेरो पालैमा ।
३० जेठ, २०८१
राधेराधे, भक्तपुर
