मनै धमिलिए पछि दिलको आखा छेक्ने रैछ
जति जति नजिक भो खोटमात्रै देख्ने रैछ ।
भत्किएको विश्वासलाई किन अब सङ्गालु म !
रङ्गमञ्च सजाएर चोटमाथी टेक्ने रैछ ।
यात्रा ठानी जिन्दगि यो डोर्याएँ र थाकिसके
पिरतिको सिरेटोले नराम्ररी सेक्ने रैछ ।
लिलामी छ बजारमा मोलमोलाई चलेको छ
मुटु, मन, हृदय त हातहातै बिक्ने रैछ !
जति चोट खेपे पनि जति खोट मेटे पनि
चुनी चुनी खुसीहरु आफन्तीले झिक्ने रैछ ।
कुन कलेज पढ्यो भने कुन पाठ घोक्यो भने-
भनिदेउ कसैले त- माया थेग्न सिक्ने रैछ !
३० असोज, २०७४
काठमाडौ ।
